صحوة الحراس
مع الشمس إن تسلل نورها عن صحوة الحراس
أهيي لك عصافير الصباح وعشها العالي
ومع كل ارتباكه للسلاسل ينذبح حساس
تخيل ويش كثر ضجت سلاسل وانذبح غالي
يقولون العرب فقد الصديق أقسى من الوسواس
وأنا أقول : الصديق اليا فقدته موتي أشوا لي
تضيق الأمكنة ، يقسى السهر ليلي تكسر كاس
وترتد القصايد عن حياةٍ ما لها والي
دخيل آخر لقا ، يوم الوطن جمرة على قرطاس
دخيل أول لقا ، يوم المدى مثل الندى حالي
دخيل اللي تبي ولا دخيلك يا رفيع الراس
أبيك منك تجي ، ولا تجي ، ولا تهيا لي
أو إنك كان ما رديت لأصحابك ، ترد الناس
أو أنك لا ترد الناس واتركني على فالي
غيابك ما كفاه أنه منعني عن دفا الجلاس
بدا يعبث بأعز الذكريات اللي على بالي
مشاوير الصبا شباك طيشي محبرة إحساس
خذن بعدك ملامح زلتي جهلي وغربالي
خلت بعدك زوايا المدرسة من بهجة الأجراس
دفاترك الأنيقة ، ضجتك بالصف ترحالي
خلت حتى الطريق لحينا من جارتين نعاس
على ايديهن تعلمنا السهر للموذن التالي
وصرت أحيى بلا صاحب ولا ذكرى ولا خناس
وأبيك تردني يا عزوتي لا أصيح : عزالي
وأنا يا صاحبي ما قلت لك : يا صاحبي لا باس
ولكن قلت : يا حالي أنا ، لا باس يا حالي
أبد ما هو سجن ذاك المكان الممتلي حراس
ولكن السجن هذا المكان الموحش الخالي
--
